政Whats噏：張文龍公開送花　梁嘉銘唔受

男仔追求女仔時方法都不外乎搞吓浪漫氣氛、送吓花咁。葵青區議會副主席張文龍今日(10日)就喺區議會開會期間公開送花畀議員梁嘉銘，點知梁唔止唔接受，仲話懷疑枝花有菌，直情掂都唔想掂。究竟搞邊科﹖

話說今日警方代表出席葵青區議會會議，期間張文龍就拎住枝白花衝去警方代表示威抗議，結果唔成功。之後張就將枝花掟咗去梁嘉銘座位，梁隨即反問︰「你送花我一定要收？拎返走啲垃圾！」其他民主派議員就起哄，反指梁阻住會議進行，仲展開激烈討論。區議會主席單仲偕最終要宣布暫停會議。

張文龍其後就想走人，但梁嘉銘就堅持要張拎走埋枝花，仲多次用身體攔截張，唔畀張離開會議室，又話慎防「有菌」，要求工作人員向枝花噴消毒水。最後枝花就被遺留喺梁嘅座位兼且斷埋，真係惹人可憐。