政Whats噏：梁家榮死撐《頭條新聞》　議員警告港台唔改革勢削支

外界不斷炮轟香港電台「大花筒」，警方亦接連去信港台，投訴《頭條新聞》抹黑警隊，廣播處處長梁家榮今日(12日)透露，收到6500宗有關《頭條新聞》嘅投訴。繼早前有建制派議員不滿港台節目立場偏頗，計劃喺立法會審議財政預算案時提出削減梁嘅人工後，再有建制派議員警告港台唔全面改革，勢必向佢哋開刀，削減開支。

梁家榮今日向同事發信，重申港台作為公共廣播機構，時刻恪守《香港電台約章》中訂明嘅公共目嘅共同使命，仲死撐《頭條新聞》並唔係新聞報道，而係諷刺時弊，反映社會脈搏。佢又話社會上唔同群組對《頭條新聞》內容表達關注，意見紛陳，由上月1日到今個月8日共收到4萬幾個意見，當中有6500宗投訴，又話會按現行機制審視處理每宗投訴，港台亦必須經常自省，虛心接受投訴，搵出有待改善嘅地方。

議員何君堯早前擬修訂預算案，削減梁嘅薪酬同負責《頭條新聞》等節目嘅公共事務組撥款後，民建聯議員梁志祥今日喺社交平台拍片，批評港台「唔抵爭」，皆因港台每年平均收視率僅錄得0.1，只有1000至2000人收睇，又話港台每年花費10億港元，但電視部開支卻高達6億港元，佢認為要睇番港台電視部水平同能力，先可判斷港台應唔應該收取納稅人金錢營運。

梁又舉例，港台有部分台接近零收視，其中教育電視節目更加「悶到(觀眾)都無心機去睇」，狠批港台「將納稅人嘅錢倒落鹹水海」。佢認為何君堯唔應該只係罰梁家榮一個人，反而要針對作為政府部門嘅港台，職員喺收取政府人工嘅同時，卻偏偏喺電視節目《頭條新聞》裡面，衊造事實老屈同鬧政府。

之後再向梁查詢，佢話《頭條新聞》可以保留，但身為傳媒嘅港台絕對唔應該製作一啲唔顧事實嘅節目，尤其係抹黑警隊喺新冠肺炎疫情下發揮嘅角色，令公眾誤解真相。佢要求港台必須全面改革，檢視節目質素，又話民建聯正考慮同探討會唔會提出削減港台開支，估計下個星期有決定。

另外，公營廣播關注組對梁家榮嘅言論感到極度不滿，直斥信內字裏行間睇到梁並冇「虛心接受投訴，查找有待改善之處」，反而繼續為《頭條新聞》護航，又直指「上樑不正下樑歪」，要求梁立即下台，並呼籲政府立即檢討港台，還香港人一個真正嘅公營廣播機構。