政Whats噏:對醫護罷工意見不一 何顯明畀泛民圍插

2020年03月12日 22:17
東網電視
更多新聞短片
何顯明同李軒朗喺會上互窒。(馮子健攝)
醫管局部分員工早前發起罷工,要求政府全面封關,醫管局承認向曾參與罷工嘅醫護發電郵跟進缺勤事宜。九龍城區議會今日(12日)召開大會討論有關議題,區議員李軒朗表明無條件支持醫護,而另一區議員何顯明就因為一句:「我搞工會嘅時候李軒朗都未出世呀!」迅即被泛民區議員圍插啦!
何顯明喺會上大鬧醫護冇按章工作,置病人於不顧,又話死咗人都唔知計落邊個到,仲形容成班新人係「小朋友」添!話聲一落,隨即惹起泛民不滿,區議員曾健超話「香港日日有人死、醫院日日有人過身」,唔可以將責任推落醫護度,而李軒朗就批評何「倚老賣老」。至於區議員郭天立就建議何開放屋企做隔離設施,用行動話畀大家知點樣支持政府。
醫護罷工未有結論,區內選址設連儂牆又起爭拗。何顯明話唔同意見人士去連儂牆貼嘢會畀人打,點知郭天立話「連儂牆不論藍黃」,仲話大家要免於恐懼表達自己嘅意見,何就即刻話:「我驚畀人劏肚呀!」但何點驚都冇用呀,最後動議以15票贊成、7票反對獲通過。