政Whats噏：邱騰華暗踩梁家榮　各界批評鬧得太遲

年花10億港元公帑嘅香港電台劣迹斑斑，節目立場偏頗，備受質疑，其電視節目《頭條新聞》更被批評抹黑警隊，遭警方兩度投訴，不過廣播處長梁家榮仍死撐節目諷刺時弊，反映社會脈搏。商務及經濟發展局局長邱騰華直至今日(17日)先至話港台須遵守約章，必須參考港台顧問委員會意見同受通訊事務管理局制約，即使坊間有人話有好多欣賞港台節目嘅數字，都唔能夠同投訴對沖，暗踩梁早前有關港台投訴數字嘅言論。但社會各界就批評邱鬧港台鬧得太遲，變相放任縱容港台，梁同邱真係要各打50大板喇。

面對各方投訴同不滿港台嘅示威，梁家榮早前喺畀港台員工嘅信中提到，港台收到約3萬宗讚賞，6000多宗投訴，會珍視回饋及虛心接受投訴，又話希望部門之間互相理解，各司其職。事隔幾日，邱騰華今日終於回應，話留意到坊間對港台嘅編採同立場有好多意見，港台既為政府部門，亦係公共廣播機構，可編採自主，唔受政策局介入，但就要按《香港電台約章》履行成立目的。

邱騰華又指約章列明，顧委會成員就港台編輯方針、節目標準及質素畀意見，港台係必須參考，亦要繼續聆聽顧委會意見並受通訊局制約，任何市民都可提出投訴，通訊局亦有法定權力處理，所得出嘅結果唔係在乎有幾多人欣賞，如坊間有人提出，有好多欣賞港台節目嘅數字，都唔能夠同投訴對沖，強調投訴成立嘅話，港台同其他機構一樣都必須更正。

時事評論員陳雲生分析，邱騰華指港台要聆聽顧委會意見、秉公處理投訴，實質暗踩港台，公開承認港台有問題，但就形容一切「嚟得太遲」，又指回歸至今港台愈嚟愈偏離公眾期望，並冇做到保持政治中立原則，唔符合成本效益，質疑政府仍未打算整頓，反將責任推畀顧委會，直言政府應直接介入處理港台一連串嘅問題，否則令人質疑邱推卸責任。

議員陳恒鑌就鬧爆政府冇勇氣處理港台問題，完全荒謬到極，直指政府要立即處理問題。佢又話，港台唔係獨立王國，並非不可攻破嘅城堡，政府應重新考慮港台係咪仲有存在價值，若冇存在嘅必要，訊息又冇真實性，就不如廢咗佢咁話。