政Whats噏：劉家衡涉歧視內地人　周浩鼎鬧楊岳橋縱容包庇

深水埗區議員李文浩同劉家衡日前係佢哋嘅聯合辦事處門外，貼咗「藍絲與狗不得內進」嘅手寫告示，連日嚟畀人上門聲討，仲一度爆發肢體推撞。議員周浩鼎今日(19日)就鬧劉家衡所屬嘅公民黨黨魁楊岳橋一直唔回應事件，係縱容同包庇喎！

民主派議員今日係立法會大會提出中止待續，周浩鼎發言時話民主派議員刻意拖延政府臨時撥款，令本地醫療同福利服務受阻，大鬧民主派唔知個醜字點寫。

周又話自己好佩服公民黨，指公民黨嘅劉家衡既然講「藍絲與狗不得內進」玩到咁開心，但公民黨竟然到依家都無回應過。反問民主派議員，到底係邊個縱容同包庇暴力？周又批評民主派刻意造成流會，係咪仲嫌香港唔夠衰，鬧佢哋淨係識得推卸責任囉！