政Whats噏:防疫包小冊子甩轆 楊雪盈被轟冇諮詢

20200324
東網電視
更多新聞短片
有區議員指,楊雪盈(圖)喺處理防疫包內嘅小冊子時獨斷獨行。(楊婷攝)
灣仔區議會今日(24日)召開第4次會議,期間邀請循道衛理中心交代早前124萬港元買防疫包嘅進度,除咗之前13位議員每位獲發244份防疫包之外,第二批嘅7000份都係上周六(21日)到貨,包括啲保護衣物、口罩等,但點知就有區議員發現防疫包內嘅小冊子有問題,質疑灣仔區議會主席楊雪盈喺事前冇作任何諮詢,程序上獨斷獨行,得佢一個人話晒事,搞到大家幫佢執手尾喎。
區議員林偉文就話,自己喺收到防疫包時先知小冊子係咩樣,仔細睇先發現有問題,例如之前取消喺區內設置消毒裝置,但小冊子都仲有呢啲內容冇刪到,名字又係武漢肺炎唔係新冠肺炎,質疑主席係未冇經區議員同意就做,結果有錯,又要大家一齊負責?又重申話唔係唔派物資,係程序上問題,叫主席做任何事要諮詢各位議員咁話。區議員李碧儀、區議員梁柏堅都同樣話自己冇睇過小冊子初步設計,完全冇傳閱過,李話事前唔知道內容,又發現小冊子冇「區議會贊助」字眼,完全係低級錯誤喎。
議員謝偉俊就話,如果將防疫包拆開抽出份小冊子未必係最好嘅解決方法,始終防疫物品開過就唔係咁好,但「區議會贊助」字眼都冇,擔心會計部會吹毛求疵,仲暗寸楊雪盈,依家唔係一個人話晒事,越位兼獨斷獨行搞到依家咁,真係要諗吓點處理喇!循道衛理中心代表其後就建議話用簡單方法,如印製一張新單張,上面交代最新資料、區議會贊助字眼、衞生防護中心電話等,之後再攝入防疫包內補鑊喇,目標係盡快派到畀市民咁話。
《香港疫慌》專頁: http://hk.on.cc/fea/hkdisease