政Whats噏:郭家麒促「疫」境開會 蔣麗芸話書面回覆較適合

20200326
東網電視
更多新聞短片
郭家麒去信要求召開特別會議,蔣麗芸就話政府透過書面回應問題最快、最有效。
新冠肺炎疫情持續,本身係醫生嘅議員郭家麒今日(26日)去信立法會衞生事務委員會主席蔣麗芸(Ann),要求盡快召開特別會議,討論喺機場工作嘅醫護人員裝備不足問題。Ann話為咗避免疫情擴散,唔想有太多人喺大樓內聚集,認為當局透過書面回覆跟進議員關注嘅議題會比較適合。
郭喺信中提到,衞生署一名醫生喺機場工作後染病,而佢僅獲發外科口罩、面罩同手套,並無穿防護衣或佩戴N95口罩,令人關注喺機場同亞洲國際博覽館工作嘅醫護人員,裝備係咪足夠同合適。
郭又認為,工業貿易署接受往來香港與內地嘅商人申請豁免出入境限制,有機會成為「播毒」途徑嘅漏洞,要求相關官員出席會議,接受議員質詢。
Ann接受查詢時話,如果開會傾嘅話會有幾百人喺大樓內聚集,變相拖延時間,最重要係為咗避免疫情擴散,所以佢收到信件後,已經同立會秘書處講,要求政府當局第一時間透過書面回應議員提出嘅問題,認為呢個係最快同最有效嘅方法。
另外,原定下個星期舉行嘅多個事務委員會會議亦都因為疫情關係,被迫延期或者取消,包括房屋事務委員會、食物安全及環境衞生事務委員會、資訊科技及廣播事務委員會同教育事務委員會。
《香港疫慌》專頁: http://hk.on.cc/fea/hkdisease