政Whats噏：羅冠聰返港避疫　周浩鼎嘲點解唔留喺美國

新冠肺炎疫情全球爆發，大量外國留學生或移居海外嘅港人急急返港避難，其中被DQ立法會議席嘅香港志常委羅冠聰喺Facebook(Fb)自爆已由美國返港，但冇交代佢係咪要接受14日強制隔離。建制派議員周浩鼎(Holden)就喺Fb拍片寸爆羅冠聰，話既然眾志同美國嘅關係咁好，問佢點解唔留喺美國同當地人民一齊抗疫。

羅冠聰喺舊年暑假到美國耶魯大學進修碩士課程，佢尋日(30日)喺Fb上載相片，貼文話已經返港，但仲要遙距上堂，完成埋呢個學期嘅課程。

好多網友留言，對佢突然返港感奇怪，佢話每日都check住機票，形容心情係好緊張，早兩個星期前終於買到。有網友話佢應該要14日隔離，但佢無答覆。

我哋問過羅冠聰有關由美國返港嘅情況，佢話唔方便喺電話講，不過就話會最遲啲再喺社交平台分享。

Holden亦喺Fb拍片，話要「溫馨慰問」羅冠聰，仲話既然眾志同美國嘅關係咁好，而相比之下香港有好多地方嘅表現不濟，提議羅冠聰講下點解唔選擇留喺美國同3億人民一齊抗疫嘅原因，又建議羅或者可以講下其實臨走之前有無同美國副總統彭斯交代將會離開當地等事宜。

臨尾Holden仲叫大家提醒羅冠聰呢排唔好周圍走，記得要家居隔離呀!