政Whats噏：陳淑莊酒吧「開會」　何啟明寸爆：點對得住醫護

有網民見到公民黨陳淑莊(Tanya)日前帶住40人，趕喺酒吧關閉前到深水埗一間酒吧「夜蒲」，Tanya事後就聲稱話係為開會。另一名議員何啟明今日(4日)就拍片寸爆Tanya，仲剪咗Tanya早幾日喺工務小組委員會開會時嘅發言片段，鬧爆佢點對得住醫護喎！

何啟明喺Facebook上載咗段片段，標題係「明寸陳淑莊」，仲剪咗Tanya早前開會時發言嘅重頭戲1分20秒。當日工務小組委員會主席盧偉國係疫情下繼續開會，審議港鐵沙中線工程追加嘅86.9億元撥款，Tanya就發言鬧爆運輸及房屋局局長陳帆，話呢啲時候仲要開會點對得住啲醫護，又講話醫護叫大家Stay home，叫全部香港盡量Stay home，話香港醫院冇爆發疫情係萬幸，但社區源頭根本有啲係揾唔到等，不斷質疑點解要咁迫開會呢？

跟住何啟明就即刻學Tanya呢段說話，鬧返Tanya禁酒令推行兩個星期，依家先一日咋，一日都忍唔到，質問佢飲酒係未咁緊要啫，點解要咁逼咁急喎，叫佢畀個理由畀全港市民，又問佢點對得住啲醫護，仲話呢個世界有樣嘢叫視像會議！攞明係寸Tanya自打嘴巴喇！

另一議員麥美娟都喺Facebook寸爆Tanya，話Tanya以議員身份去酒吧開會，麥都可以開住會去食麻辣火鍋喎，仲講笑話陳議員咁樣講，陳局長唔該講兩句。唔知食物及衞生局局長陳肇始會唔會回應呢？

政府在晚上回應事件，指出《預防及控制疾病（禁止羣組聚集）規例》（第599G章或《規例》） 已於3月29日凌晨零時生效，食物及衞生局局長亦已根據《規例》，指明由3月29日至4月11日期間內，不得在任何公眾地方進行多於4人的羣組聚集。據報，有立法會議員在4月2日晚上在一間酒吧內與約40人聚會，並聲稱該酒吧在聚會期間落了一半鐵閘及沒有營業，而參與該羣組聚集的人士在聚會期間有保持社交距離。

根據《規例》，公眾地方是指公眾人士或部分公眾人士可以或獲准不時進入的地方；即使某私人物業，如果容許公眾人士或部分公眾人士不時進入，例如食肆、酒吧及戲院等，該私人物業亦會符合公眾地方的定義，而《規例》中有關禁止羣組聚集的規定亦會適用。因此，相關酒吧內的群組聚集是否在公眾地方進行，會視乎實際情況。如當時情況下，公眾人士仍有可能進入酒吧範圍，即可能符合公眾地方的定義，《規例》中有關禁止群組聚集的規定亦適用。根據《規例》，任何人如參與或組織被禁止的群組聚集，或明知而容許在其擁有、控制或營運地方進行該群組聚集，即屬犯罪，一經定罪，可處第4級罰款25,000港元及監禁6個月。

《規例》的附表一列明12項被豁免的群組聚集，其中一項為「為執行法定團體或政府諮詢機構的責任而進行的群組聚集」；另一項則為對在立法會或區議會進行的程序屬必要的群組聚集。然而，立法會並非法定團體或政府諮詢機構，議員在議會以外其他場合參與或組織群組聚集，不管是否屬於立法會的職能，亦不屬此項獲豁免的群組聚集。