政Whats噏：1823有進步？多人用但仍未達標

政府早年推出「1823政府一線通」，方便市民可以透過1個熱線，就可以向多個指定政府部門查詢服務，以及處理投訴。不過，1823自推出至今，長年被狠批無人接聽，熱線形同虛設。之但係，當局回應議員書面質詢時透露，舊年1823嘅表現竟然有進步？

創新及科技局提到，1823喺2018年只能夠喺12秒內接聽67%來電，但2019年嘅處理情況就提升至68%。換句話說，即係有1%進步咁大把，但其實仍然遠低於政府訂下、12秒內要接聽至少80%來電嘅目標。當局解釋，市民來電要等候幾耐，係受到來電量、整體來電處理時間同員工人數等因素所影響咁話喎。

當局又話，1823喺舊年曾協助處理大量有關「關愛共享計劃」同出售居屋項目等來電，接獲市民嘅來電數目由前年嘅370萬，上升至舊年嘅450萬。之不過，睇番1823喺網頁嘅數字，今年頭兩個月嘅服務表現跌至61%，睇嚟有關部門仲有好多進步空間喇！