政Whats噏：仇栩欣報警控外傭遭圍插　唔夠3個鐘「跪低」

疫情當前，政府訂立「禁聚令」限制人群聚集，東區區議員仇栩欣今午（12日）喺Facebook(Fb)發貼，指其選區每逢假日都會有大批外傭聚集喺快遞公司門口包裝快遞，仲話擔心佢哋聚集後染病嘅話會造成屋苑大傳染，並已要求警方定其到現場對聚集嘅外傭作出檢控。但呢個Post出街後隨即被圍插，搞到佢要喺唔夠3個鐘頭內迅速「跪低」！

查實有唔少泛民都不滿「禁聚令」變相令警方可以行使更大權力，而仇喺舊年年中亦曾被警方拘捕，所以佢今次以報警方式處理外傭聚集，就惹嚟質疑同佢一直要求限制警權立場相違。另外，亦都有唔少人提醒仇要照顧返外傭嘅權益，更加有人用種族歧視嚟批評佢。

事隔唔夠3個鐘，佢再次出貼解釋自己想處理外傭聚集情況嘅原因。不過，面對唔少網民同泛民中人批評佢搵警方執法時，佢就迅速「跪低」，話未來會轉為同食環署商討點處理咁話喎！