政Whats噏:特首辦各職員電郵相同 陳家豪:不如刪晒佢

2020年04月15日 23:37
東網電視
更多新聞短片
陳家豪見到特首辦清一色嘅電郵地址,以為頁面壞咗。
政府電話簿提供政府各決策局同部門嘅查詢電話,以便同外界保持聯繫。雲端與流動運算專業人士協會會長陳家豪(Emil)翻查行政長官辦公室電話簿嘅時候,發現特首辦所有人嘅電郵都一模一樣喎,連懸空嘅職位都有聯絡電郵,究竟搞乜嘢呢?
Emil早前喺社交平台上載特首辦電話簿嘅截圖,圖中見到特首辦所有人用同一個電郵地址。佢話,香港政府嘅網絡鴻溝喺圖中可見一斑,仲質疑究竟係網頁系統或者編輯出錯,定係香港政府最高領導有其「創新」使用互聯網通訊模式嘅獨特風格?佢咁講,擺明係嘲笑頁面設計有問題啦。
有網民就留言話,咁多人用同1個電郵,如果被黑客入侵,咪會影響好多人?亦有網民留言話「多做多錯,少做少錯,唔做無錯,一做就錯。」問Emil何苦令佢吔尷尬喎。Emil就答話,唔通好似愚公一樣,見到前面有座山當睇唔到咩!
其後我哋問返Emil。佢話一撳入去特首辦嘅電話簿,見到清一色嘅電郵地址,以為頁面壞咗啦,點知並唔係壞咗,而係個頁面本身就係咁。佢話政府扮開放,實質咁多重複嘅電郵簡直係多餘,反正都相同,不如全部刪晒佢啦!佢仲話全世界都冇幾多個城市嘅主要官員會公開電郵地址,因為只要一公開,難免會收到大量垃圾電郵,導致成個電郵癱瘓而失去應有功能,直言唔知特區政府為乜孭咁多無謂嘅「負擔」。
Emil話,其實每個部門嘅電話簿頁面睇落無論喺字體、顏色等方面都一樣,但實質上每個部門需要負責返自己嘅頁面,並無單一部門統籌政府電話簿整個網頁。究竟點解會咁?佢話主要係政府沿用緊傳統嘅經濟分工模式,跟唔上時代嘅變化;各部門嘅職能不同,導致各做各嘅事,完全冇溝通,以致出現好多冇必要嘅繁複手續,譬如派4,000蚊嘅關愛共享計劃理應收集咗市民嘅數據,但今次全民派1萬蚊,就又要填多次個人資料啦!