政Whats噏:陳肇始自誇「沉着」抗疫 議員斥唔知醜

2020年05月02日 10:27
東網電視
更多新聞短片
陳肇始話全靠政府同醫護人員沉着應戰守住防線,被斥唔知醜。
新冠肺炎疫情近日有緩和迹象,今日(2日)係香港連續13日冇出現本地個案。食物及衞生局長陳肇始出席一個電台節目時話,對現時香港疫情紓緩覺得「感恩」,又回顧話全靠政府同醫護人員喺每波措施都沉着應戰,先守得住防線。點知一句「沉着應戰」又惹風波,有議員批評政府防疫慢幾拍,疫情爆發初期仲呼籲市民非必要時唔使佩戴口罩,認為有此好成績全靠港人而非政府,批評陳嘅言論簡直係唔知個「醜」字點寫。
陳肇始喺電台節目話,回顧香港抗疫100日,對此覺得感恩,當政府第一日知道武漢有疫情之後,一直沉着應戰,其後推出唔同措施,包括關閉邊境、14日強制檢疫及社交距離限制等,喺同事及義工等不同方面嘅共同努力下,行到依家都算「守得住」、「撐得過」。但佢就強調目前外圍疫情因素仍然唔穩定,唔同地方仍有新冠肺炎個案爆發,港人要沉着應戰,唔可以鬆懈喎。
陳又話,好多市民同業界都期望放寬限制社交距離措施,形容放寬呢啲措施既係科學亦係藝術,要平衡感染風險,亦要讓市民同業界恢復生活。佢仲提及,政府打算想多兩步,包括作最壞打算,例如準備老人院舍爆發疫情,都會計劃未來,考慮現有隔離設施是否足夠,要唔要加強人手培訓對傳染病嘅認識等。目前亦搵緊更多地方應付爆發個案,短期內將有更多設施。佢又話即使疫情紓緩,都要做最壞打算,當局未來會繼續加強社區檢測及檢疫設施,及協助出院病人復康。
陳肇始講咁多嘢,議員郭家麒就批評佢完全係自吹自擂,諗番疫情爆發初期,政府甚至呼籲市民非必要時唔使佩戴口罩,並拒絕封關,要市民自己四出撲口罩等防疫不力嘅情景,至今仍歷歷在目,相對其他鄰近地區如澳門、台灣等地防疫反應迅速,港府只係等運到。郭仲話,好彩港人夠自律,才有依家嘅好成績,點知如今竟然話係政府功勞,鬧爆陳肇始簡直唔知個「醜」字點寫!
其實諗番之前,外界成日猛烈批評政府防疫同抗疫嘅工作慢幾十拍,喺疫情最初,抗疫物品好似口罩等嚴重缺貨,市民就將矛頭指向陳肇始,鬧爆佢係「狗官」同「害人精」,防疫把關不力,之後又遲遲唔肯全面封關,被指有違專業,輕視疫情發展,直至推出社交戒嚴措施,又錯漏百出,被批評防疫措施做一半唔做一半,成效存疑等。喺咁嘅情況下,陳肇始仲自誇政府抗疫沉着應戰,真係笑大人個口。
《香港疫慌》專頁: http://hk.on.cc/fea/hkdisease