政Whats噏：陳恒鑌趕郭家麒　事隔一日仍隔空對罵

中醫藥發展事宜小組委員會尋日(4日)召開會議，議員郭家麒喺會上故意將新冠肺炎講成「武漢肺炎」，被委員會主席陳恒鑌(Ben)裁定為「非議會言語」。郭就話Ben係傻嘅，而Ben就直接將郭趕出會議室。本身以為事情告一段落啦，點知兩位議員今日仲喺社交平台「隔空對罵」，拎返件事出嚟繼續講喎。

喺尋日嘅會議上，郭向食物及衞生局副局長徐德義提問期間，刻意將新冠肺炎講成「武漢肺炎」。Ben就話，喺徐回答之前要澄清，世界衞生組織已經將病毒命名為「2019冠狀病毒病」，希望議員唔好再講「武漢肺炎」，否則就會裁定為使用「非議會言語」。而郭仲狡辯話議會入面嘅發言受到保障，講嘅嘢冇侮辱議員或官員，仲鬧Ben係傻嘅。Ben就忍唔落，直接將郭趕出會議室。

事隔一日，Ben喺社交平台上話郭身為醫生都唔尊重世衞，仲大鬧郭搬出大篇歪理，又以語言辱罵，再一次引證攬炒派嘅素養！而郭都係社交平台繼續狡辯，話根本冇人將「武漢肺炎」列為「非議會言語」囉。