政Whats噏：試戴銅芯口罩　林健鋒：舒服但有啲焗

政府向全民派發可重用嘅銅芯口罩，今早(6日)開始接受申請，而部分議員都收到一個銅芯口罩作試用。身兼行政會議成員的經民聯商界議員林健鋒就話「政府嗰個(口罩)焗啲！」

政府派銅芯口罩，但市民都唔知戴咗之後嘅感覺如何。本身設廠生產口罩嘅林健鋒就幫市民做「白老鼠」，用銅芯口罩同自己生產嘅一次性口罩作對比。林話，銅芯口罩嘅質感都幾舒服，有技術性隔菌係最重要，但就話「政府嗰個焗啲」，冇自己生產嘅口罩咁「通爽」，又話唔係「賣花讚花香」，而係事實喎，但佢就強調只係自己嘅感覺。

至於銅芯口罩嘅外觀遭不少市民話似「底衫褲」。林就話，外觀就見仁見智，但希望政府喺設計同包裝上面再擺啲心思，整多幾個款式，以免市民一家幾口出門口嘅時候拎錯嚟用！

不過，紡織及製衣界議員鍾國斌（Felix）就話政府口罩焗啲，唔夠自己生產嘅口罩舒服。Felix又話口罩外形似尿片，自己就一定唔會戴出街，費事畀人影到話戴底褲啊！

Felix話銅芯口罩一定焗，本身口罩得3層，政府就6層。加上銅唔可以染顏色，所以口罩一定要配返銅嗰種顏色先搞到咁似內衣褲。佢打算之後做個實驗，倒啲水落政府口罩入面，睇下會唔會漏水，測試下係咪真係防到飛沫。

被問到政府設計口罩時有冇問佢意見，Felix笑說政府抄佢，比喻做「邊有深圳羅湖城A貨走去問LV意見㗎！」佢又批評政府口罩車工又差，啲布摺起晒，不過佢對口罩最後嘅評價都係「是但啦，免費嘢，唔使錢。」睇嚟市民試下都無妨嘅。