政Whats噏:政府「拖延症」發作 口罩派錢救援金樣樣拖

20200508
東網電視
更多新聞短片
政府被轟「拖延症」發作。(設計圖片)
本港不經不覺經歷咗3個幾月既新冠肺炎疫情,當市面上嘅口罩荒有所紓緩,政府先姍姍來遲,宣布全民派口罩嘅決定。之但係個銅芯口罩又惹來危害健康、利益輸送同私隱外洩嘅疑慮,總之就係問題多多。其實政府做事慢兼甩漏多嘅措施,又點只派口罩咁少,譬如之前財政預算案宣布全民派錢10000港元,但到依家連申請登記辦法都未有詳情。對於失業率高企,又傾向保企業,打工仔可以受惠嘅唔多,對失業大軍嘅支援更加喺少之又少,所以與其話呢個政府做事「慢三拍」,倒不如話佢患咗拖延症。面對個咁樣嘅政府,作為市民認真閉翳。
政府面對批評,成日都攞「世上唔會有一個完備嘅方案」嚟做擋箭牌,但換個角度諗,市民都好唔明點解政府辦事總係要補漏拾遺。好似近幾個月推出嘅兩輪「防疫抗疫基金」,次次推出後都畀跨政黨輪番炮轟唔足夠,當中最經典嘅就係,個個政黨都建議政府要為未來嘅失業大軍做準備,設立為期3至6個月嘅短期失業援助金。惟勞工及福利局局長羅致光一直懶理,更辯稱已經喺綜援系統抽咗個項目出嚟改良畀失業人士申請。之不過,改良咗嘅綜援都係綜援,本質無變到,市民如非必要仍然唔想畀人標籤,最後幫到幾多因疫情失業嘅市民渡難關可想而知。
另一方面,好多市民都想政府盡早全民派錢10000港元,當係及時雨應付一下生活嘅必須開支。然而呢個患咗拖延症嘅政府,到依家都未有公布詳情,新上任嘅財經事務及庫務局局長許正宇都喺執前人口水尾,話「6月底接受申請、7月開始發放」,企硬唔肯體察民情,真係希望政府唔好病情惡化,好似對上一次派4000港元咁,派足9個月都仲有市民未攞到。
至於喺全民口罩荒最嚴重嘅時候,政府既龜縮無影,叫市民自己處理,更甚者呼籲市民唔需要戴口罩,面對呢個遲來且問題多多嘅銅芯口罩,市民真係唔知嬲好定笑好。其實為官者,最重要係施政得宜。所謂施政得宜,就係喺適當嘅時間做合適嘅政策,如果政府喺市民最需要口罩嘅時候派口罩、喺最需要現金周轉嘅時候派錢、喺最多人失業嘅時候設立短期失業援助金,相信依家將會係另一番光景,而唔喺「澳門都好過香港、快過香港」嘅聲音不絕於耳。