政Whats噏：傅曉琳同馮盈盈撞衫　結果係......

大嶼山發展諮詢委員會成員傅曉琳(Sammi)一直都係公認嘅政界小花，唔單止工作方面係實力派，仲樣靚身材正，若果同香港小姐冠軍拍埋一齊，又點睇呢？

Sammi今日(12日)喺Facebook上載咗1張同2016年香港小姐冠軍馮盈盈嘅對比圖，相中兩人撞衫，着住一套藍色連身裙，表情亦同出一轍，不過Sammi就寫話「瘦同肥嘅分別」，仲感嘆點解對方條腰可以咁幼喎，睇嚟佢唔太滿意自己身材嘞！

雖然係咁，相片一出就吸引唔少人畀Like，仲有唔少網民喺下面留言，稱讚兩人都靚，安慰Sammi話係幻覺嚟，鼓勵佢由今日開始節食同運動，就一定得！不過，都有人話Sammi靚啲，更加神采飛揚、自信十足、線條較有美感。