政Whats噏：徐英偉甩轆　嗌錯陳肇始英文名

民政事務局局長徐英偉雖然坐正唔夠一個月，但都已經試過同其他政府官員同台，一齊召開記者會，但點知，佢今日(19日)聯同食物及衞生局局長陳肇始（Sophia）一齊召開記者會，宣布延長禁聚令措施就頻頻甩轆，多次嗌錯陳肇始嘅英文名。

今日政府宣布延長禁聚令措施，徐英偉同陳肇始一齊出席記者會，但唔知係咪因為太緊張，徐英偉竟然嗌錯同事陳肇始嘅英文名，將Sophia嗌成Sophie，仲要唔止一次，前後至少五次嗌錯！

話曬徐英偉以前都係勞工及福利局副局長，冇理由連政府團隊成員都唔知到姓甚名誰，唔知係一時唔小心嗌錯，定其實係佢同Sophia太熟，想叫佢個暱稱，緩和吓記者會個氣氛，比大家係疫情中苦笑吓呢！