政Whats噏：鄭若驊民望續「墊司底」　問責團隊表現唔合格

政府無能，施政「離地」導致民怨沸騰。最新嘅民意調查結果顯示，問責團隊嘅表現唔合格，特首林鄭月娥同3名司長表現嘅滿意度評分全線下跌，其中被嘲為「避政司司長」嘅律政司司長鄭若驊繼續「墊司底」，評分較上次調查再跌0.12分，僅得1.41分，評分之低更加係司局長中排包尾，簡直係低處未見低。

香港研究協會喺5月11至18日，成功訪問1097名18歲或以上嘅市民，受訪者就特首、司局長表現嘅滿意度進行評分，1分為非常不滿意、3分為一般，5分為非常滿意。結果顯示，特首同3名司長嘅評分都低過2分，13名局長嘅評分均不足3分，顯示問責團隊嘅表現唔合格。

調查結果又發現，林鄭表現嘅滿意度評分較上次調查下跌0.14分，跌至1.61分；政務司司長張建宗亦下跌0.15分，只有1.69分，而財政司司長陳茂波嘅評分跌幅最大，下跌0.18分至1.8分，而鄭若驊則繼續「墊司底」，而評分再跌，顯示愈嚟愈多受訪者唔滿意佢嘅表現。

梗係喇，鄭若驊上任後一直醜聞纏身，又唔做好呢份工。點解咁講？事關佢份工嘅職責，其中一項係要解釋法律條文，但每次有新嘅計劃甚至係解釋檢控政制，都唔親身出嚟解釋，反而匿埋寫網誌回應具爭議嘅事件，佢龜縮做鍵盤戰士，難怪被嘲為「避政司司長」。其實，外界不斷有強烈聲音，要求佢快啲辭職，唔好阻住地球轉，而政府喺上月底大換班，亦有議員批評佢能力有問題，對外解說工作不足，質疑點解無換走佢。究竟係政府高層死攬唔炒佢，抑或係佢賴死唔走？

唔單止鄭若驊嘅表現差，查實整個問責團隊嘅表現都唔合格。民調結果顯示，喺13名局長之中，教育局局長楊潤雄嘅得分包尾，只有1.88分，相信係同近期連串嘅教育風波有關，例如有小學教師歪曲鴉片戰爭嘅歷史，甚至中學文憑試歷史科「賣國」試題等等。至於4名新任局長，以財經事務及庫務局局長許正宇嘅評分最高，有2.13分，而民政事務局局長徐英偉最低分，只有2分。

喺政府施政方面，紓緩房屋問題同推動民主發展嘅評分最低，僅得1.89分，隨之係促進社會和諧，只有1.94分。