政Whats噏:財委會響表決鐘 麥美娟張宇人竟出走?

20200522
東網電視
更多新聞短片
張宇人(前)同麥美娟(後)直奔入2樓會議室,入返去開財委會。(溫國佳攝)
立法會財務委員會今日(22)晏晝開會,繼續審議海洋公園嘅撥款申請,去到大約5點鐘嘅時候,幾個議員突然衝出會議室,當時財委會響緊表決鐘,佢哋竟敢出走?
係就係響表決鐘,但唔係表決撥款申請,而係表決由議員朱凱廸要求傳召海洋公園嘅債權人出席會議嘅動議,當時就見到麥美娟、謝偉俊、謝偉銓、張國鈞同張宇人急急腳由二樓會議室跑出,直奔?口入?落1樓,大約2至3分鐘後,又見到佢哋上返嚟,又狂奔入2樓會議室,開財委會。
跑嚟跑去做乜?趕住去邊?原來譴責民主黨(白鴿黨)議員許智峯(峯鴿)議案成立嘅調查委員會喺五點鐘開會,撞晒時間呀!佢哋係委員會成員,而麥美娟仲係委員會主席添!
事後問返麥美娟,話佢哋幾位議員趁住財委會響鐘5分鐘嘅投票時間,趕住落去一樓點名開會,好彩最後都夠法定人數開會,唔係過咗15分鐘就會流會。
麥美娟形容調查委員會進度大致良好,希望呢屆會期結束前可以提交報告畀大會,但細節就唔方便透露咁多喇!