政Whats噏:工務小組加會又取消 搞邊科?

2020年05月22日 20:49
東網電視
更多新聞短片
盧偉國取消下星期一嘅工務小組會議。
工務工程撥款向來都大塞車,工務小組委員會主席盧偉國早前就話,下星期一(25日)早上8點半至10點半,將會加開兩小時會議,但點知加咗會之後,轉個頭今日(22日)又話取消,究竟搞邊科?
問返盧偉國,佢就話其實係夠法定人數嘅,但因為聽返啲出席唔到會議嘅委員話,非常關心依家傾嘅兩個議題,包括科學館、歷史博物館及體育學院擴建工程,同埋超過200億港元撥款嘅醫院擴建計劃,話好想參與討論,於是佢同副主席莫乃光傾過後,就決定取消呢次會議,等大家下次可以參與討論。
盧又笑住話,另一方面都考慮到近日議員都好忙碌,好似內會打大交咁,議員都好辛苦喎。但工務工程塞晒車,擔唔擔心好多工程又押後呀?佢就解釋,其實財會近日討論向海洋公園撥款54億港元作救亡,都用咗唔少時間,財會都處於塞緊車狀態,就算工務過到,睇怕都有排先上到財會啦!