政Whats噏:網媒收律政司信件 岑敖暉散播謠言文章下架

2020年05月23日 16:46
東網電視
更多新聞短片
有關網媒將岑敖暉嘅文章暫時下架。
荃灣區議員岑敖暉今個月初曾喺網上媒體撰文,話舊年一名男子由將軍澳尚德停車場墜下死亡一事,批評警方謀殺市民,岑被指煽動仇恨同鼓吹暴力。有關網媒今日(23日)收到律政司來信,指岑喺今個月9日喺該網媒刊出嘅文章,違反高等法院禁制令,要求網站7日內回覆,網站已將文章下架。
該網媒今日下晝3點幾,分別透過社交平台同網頁發出聲明,指收到律政司嘅相關信件,決定暫時將岑敖暉較早前撰寫嘅文章下架,又話會盡快索取法律意見,商討下一步行動。
岑敖暉喺本周三(20日)曾喺社交網站貼文,話收到律政司嘅信件,指佢嘅文章涉嫌促進、鼓勵或煽動暴力同埋違反法庭禁制令,要求佢喺7日內移除該篇文章。當時岑話備悉,又話收到信後曾諗過刪走文章,但經過考慮後,話如果習慣咁樣嘅行為會「犯法」、習慣「以言入罪」係「常態」,唔單止呢個政權可怕,「習慣」同「退縮」都幾恐怖。
其實,警方喺上周五(15日)曾發聲明,指岑嘅文章缺乏事實根據嘅指控,對此表示極度憤慨同遺憾,又嚴正要求岑停止散播謠言,並不排除會採取進一步法律行動。警方又話岑身為區議員,不但未有以身作則向暴力說不,反而散播謠言,鼓吹市民使用真槍實彈同爆炸品等暴力手段,有違公職人員應有操守。