政Whats噏:專責小組督港協暨奧委會 議員斥「圍威喂」

20200525
東網電視
更多新聞短片
港府近年開始加大對體育界嘅資源投放,惟審計報告早前揭示中國香港體育協會暨奧林匹克委員會(港協暨奧委會)管理不善,赤字喺短短5年間激增16倍,選拔運動員嘅過程亦欠透明,而且好多採購都冇招標報價,雖則政府話會撥錢畀該會成立專責小組,檢視各體育總會嘅運作同內部監管機制,但小組成員都係由該會遴選,令人擔心小組最終變成「自己人查自己人」嘅公關擺設。講到尾,如果港協暨奧委會真係有改革嘅決心,喺各方面提高透明度先喺當務之急。
事緣前年亞運蛙泳比賽項目嘅選手遴選過程被質疑不公平,當時最快紀錄嘅泳手獲報名推薦參加比賽但冇入選,同埋遴選條件至今都冇公開,審計署早前公布嘅報告都有就呢方面提出質疑,又指該會到依家仲未落實廉政公署喺2011年出版有關運動員選拔等嘅《體育總會防貪錦囊》。
立法會政府帳目委員會今日(25日)召開公開聆訊,班議員都主要針對遴選機制嘅透明度去審港協暨奧委會呢筆糊塗賬。雖則港協暨奧委會義務秘書長王敏超話,如果選手不滿遴選結果,可按現行機制透過所屬總會要求覆檢,又設有上訴委員會畀選手提出上訴。
惟有關說法引起多名議員質疑,所謂嘅「上訴委員會」從未接獲任何上訴,又冇上訴程序可以跟隨,令選手根本無從投訴。帳目委員會主席石禮謙都忍唔住點出,港協暨奧委會有關成員與總會成員重疊,會唔會好易造成「圍威喂」嘅情況。
另外,港協暨奧委會盤數搞到一鑊泡,赤字喺短短5年間激增16倍,而好多採購都冇招標報價,令帳目唔清唔楚,難免令人猜測當中係咪涉及利益輸送。
針對港協暨奧委會管理不善嘅問題,民政事務局話自2020至21年度開始會向該會撥一筆為期5年、每年500萬港元嘅限時撥款,以成立一個專責小組檢視各體育總會嘅運作同內部監管機制,包括制訂一套管治守則,檢視各體育總會財政報告及審計機制、運動員遴選及上訴機制等,以提高管治水平及透明度。
雖則王敏超話對專責小組有初步計劃,指會成立由獨立專業人士組成嘅義務督導委員會喎,但人選又喺由港協暨奧委會挑選,其改革嘅決心有幾大實在不無疑問。至於義務督導委員會最終會否淪為一場粉飾太平嘅公關秀,睇嚟大家只可以放長雙眼喇。