政Whats噏﹕徐英偉買一萬港元曲奇　被批做騷

疫情下政府成日話要同市民共度時艱，各界一直叫問責官員帶頭減薪，政府就遲遲先肯減薪10%。而嚟緊政府派1萬港元，市民再關注官員會點樣用呢筆錢，佢哋話會攞呢1萬港元，藉住消費刺激本地經濟，但就冇正面回應會唔會捐錢。

民政事務局局長徐英偉早前公開呼籲市民向非政府機構捐出1萬港元，但自己就冇表明會捐錢。局方今日(20日)喺社交網站上載影片，見到徐英偉去社企買咗價值10120港元嘅蛋糕同曲奇，之後送畀住喺院舍嘅長者。徐英偉話自己「先使未來錢」，將尚未到手嘅1萬港元作良心消費，令呢筆錢更有價值同意義。

但網民似乎唔收貨，話徐英偉1個月人工大約33萬，依家只係貢獻1日人工出嚟，但就放晒上網「做騷」，叫佢捐返一頭半個月人工先好出嚟咁話。