政Whats噏:推算湖北省染疫人數 高永文批袁國勇太片面

2020年06月21日 19:03
東網電視
更多新聞短片
高永文(左)批評袁國勇(右)嘅研究報告太片面。
新冠肺炎疫情持續,早前香港大學微生物學系講座教授袁國勇團隊發表研究報告,從乘搭港府派出嘅湖北包機返港人士,推算湖北省有220萬人感染新冠肺炎。不過袁嘅昔日同窗、食物及衞生局前局長高永文就批評報告「太片面」,仲認為作為專家應要根據科學原則研究。
早前港府曾派出湖北包機,接觸滯留當地嘅港人返港,袁國勇嘅團隊分析咗返港人士嘅抗體,469名返港人士中有452人做咗血清測試,當中有17人有新冠肺炎抗體。團隊按依個數據推算,湖北省5900萬人口中可能有220萬人曾感染新冠肺炎,認為確診人數比官方高。
高永文最近接受訪問時就質疑,剩係研究從湖北返港嘅港人,係咪有足夠嘅代表性可以代表到湖北省普遍嘅市民。佢認為唔值得用比較片面嘅資料,去做咁重要嘅假設,再投射一個數目出嚟。
高永文仲話作為專家應要跟返科學原則,用返事實根據去研究,而佢亦明白有部分專家會透過用「worst scenario(最壞嘅情況)」去令市民增加危機意識,但佢認為無論係基於乜嘢出發點,都應要基於實證科學。