政Whats噏：何君堯控林卓廷誹謗　法庭文件「卓」變「桌」

議員何君堯舊年入稟高等法院，控告公民黨郭榮鏗、民主黨林卓廷和議會陣線毛孟靜誹謗，話3人喺舊年8月12日立法會保安事務委員會成員到粉嶺警察機動部隊總部，參觀警方水炮車演示期間，公開指罵佢為「黑社會」，並拍下影片及流傳。近日被告之一林卓廷就收到法庭文件，但點知就寫錯咗個名！

林卓廷今日(27日)喺Facebook上載咗張相，但答辯人並非寫上林「卓」廷，而係「桌」，仲自嘲話終於有英文名，叫Table LAM喎。問返佢究竟幾時收到法庭文件，佢就話其實早幾日就已經收到，不過一直都係律師處理，自己冇跟進到，今日得閒睇吓就嚇一嚇，心諗咁都得？

佢仲話好多人將佢嗰「廷」字寫成「庭」，都叫情有可原，寫成「桌」真係出乎意料之外囉。問佢會唔會投訴？佢就話唔識喎，要等律師睇吓，唔似何君堯咁有法律知識咁話。