政Whats噏：港府政策解說被轟落後　陳克勤：停留喺石器時代

今屆政府上場3年以來，曾推出多項政策引起軒然大波，要數最嚴重嘅一次當然係自去年起、因政府建議修訂《逃犯條例》所爆發嘅反修例風波，呢場政治風暴至今仍餘波不斷，嚴重影響本港嘅經濟同社會安寧。議員陳克勤就將問題嘅原因，歸咎喺港府解說政策嘅方法落後，好似停留喺「石器時代」咁，敦促當局應檢討點樣同現今嘅網絡世界接軌！

陳克勤今日(8日)喺Facebook(Fb)上載一段短片，形容政府過去向公眾解說政策時，好似係嗰啲停留喺石器時代嘅原始人，仲係用緊石頭嚟做工具，反問政府用呢啲咁落後嘅方法，點樣應對社會喺Instagram(ig)同Telegram(tg)等社交媒體上嘅訊息演變呢？

佢又提到，雖然建制派嘅政黨都會協助政府喺網上宣傳同傳遞事實，但就覺得解說政策嘅責任主要係喺政府身上。佢仲話，若果政府作為負責推動政策嘅人，都唔能夠將訊息清楚咁話畀市民聽嘅話，就證明呢個政府喺推動政策方面真係好失敗！