政Whats噏:議員唔連任 9.30前要搬離立法會

20200720
東網電視
更多新聞短片
唔連任嘅議員需要喺9月30日前搬離立法會。
第六屆立法會會期喺上星期五(17日)結束,今屆都有唔少議員決定唔連任。立法會秘書處今日(20日)向各位議員發電郵,指一眾唔尋求連任或者不獲連任嘅議員,其辦事處需要喺今屆任期結束前搬離立法會,即係9月30日,秘書處都會喺短期內向全體議員發通告詳細講解結束辦事處嘅安排。
根據立法會秘書處嘅文件,行政管理委員會喺早前嘅會議上就決定咗,由今屆會期結束,直到換屆選舉結果公布嘅一段時間,議員唔可以使用立法會綜合大樓嘅傳媒設施,包括新聞發布室、記者採訪室、咪兜等。行管會又話,所有議員都唔應該喺立法會綜合大樓內的任何地點同傳媒會面,即使唔尋求連任嘅議員都冇得例外。
至於選舉結束後,行管會同意喺選舉結果公布後,候任議員即可使用立法會大樓內為議員提供嘅設施,包括停車場、圖書館、檔案館、二樓嘅兩間等候室、三樓及五樓的會客室、咖啡角、天台花園、議員活動室,以及傳媒設施等等。