政Whats噏:搞革命攬炒 何濼生狠批戴耀廷手段狡詐

2020年07月26日 15:04
東網電視
更多新聞短片
何濼生狠批戴耀廷同反對派以狡詐手段推動革命。
香港近年發生一連串社會事件,由2014年嘅違法佔領行動(佔中)、2016年旺角暴亂,以至喺舊年6月起爆發嘅反修例連串衝突,至今仍未平息。嶺南大學潘蘇通滬港經濟政策研究所高級研究員何濼生喺港台節目《給香港的信》中,炮轟佔中發起人之一、香港大學法律系副教授戴耀廷提出「攬炒十部曲」,引領反對派以狡詐嘅手段推動革命,令香港動盪同經濟癱瘓。
何濼生喺信中批評革命陣營以非法、暴力、狡詐嘅手段推動革命,而戴耀廷引領反對派實行對北京嘅革命計劃,首先喺立法會選舉爭取過半議席、否決財政預算案令政府停擺、令政府逼於解散立法會作補選、反對派會再次預計取得過半議席、繼而迫使行政長官辭職。
戴耀廷早前預計北京會成立臨時立法會、任命新嘅行政長官、再拘捕民主派領袖等。何濼生話呢一連串計劃會造成社會動盪同經濟癱瘓,亦會令中國政府受到國際制裁。對於戴耀廷形容要「攬着中共一齊跳出懸崖」,甚至話自己都想像唔到之後嘅事態發展,何濼生形容呢個企圖令人反感。何濼生話竟然有唔少人參與戴耀廷推動嘅民主派初選,對此感到沮喪。
何濼生話戴耀廷當年發起佔中時宣揚愛與和平,但當見到戴提出嘅「攬炒十部曲」都覺得難以置信,但依家可以確定戴係逐漸實行緊呢個計劃。佢覺得戴喺社會上有相當地位,應該負上一定嘅社會責任。
《港區國安法》正式實施,何濼生話明白好多人抱有警惕性,但佢覺得大家應該畀時間留意會點樣執行法例。佢話香港經歷佔中、反修例事件,先引致國安法實施。佢認為只要香港仍然遵從《基本法》就唔會出現任何問題,話若果香港唔再係好似以前咁蓬勃發展,中國亦唔會得到任何好處,呢個唔會係中國所希望見到嘅局面。
何濼生形容香港已經變得唔一樣,香港人分成咗兩大陣營,其一係反對派,另一陣營唔支持革命,遠離暴力行為。佢相信大家同樣熱愛香港,希望香港變得更好,希望大家可以合作尋找出路。