政Whats噏:身份證用異體字 蘇逸恒:差啲要改晒所有文件

2020年08月01日 16:36
東網電視
更多新聞短片
蘇逸恒做咗27年人,先至知自己身份證上嘅名係點寫!
中文有個概念叫「異體字」,有啲字即使係同一個讀音、同一個意思,都可以有唔同寫法,就好似「恒」同「恆」咁。東區區議員蘇逸恒(阿蘇)尋日就喺Facebook上載兩張相,話突然發現自己身份證上嘅「逸」字,個「艇仔邊」係有兩點嘅「⻍」,而唔係一般人平時寫開嘅「辶」,差啲要改晒所有文件添!
阿蘇就話,其實自己一直都冇留意過呢個問題,即使係舊年參加區議會選舉時,都冇人反映過呢個問題;之不過,若果喺正式文件上將自己嘅名寫錯咗異體字,例如將個「蘇逸恒」寫錯成「蘇逸恆」,嗰份文件就可能不被接受,所以日前佢準備參選立法會嘅文件時,就有人提醒佢呢件事喇!
阿蘇之後就發現,佢身邊有朋友嘅名都係有「逸」字,但身份證係顯示一點嘅「辶」,而唔係好似阿蘇身份證上嘅「⻍」,搞到佢一度好擔心所有文件要重新填過。但後來阿蘇發現自己嘅車牌等證件都係用「辶」嘅「逸」,就相信呢個只係電腦嘅字型問題,即使係唔同寫法都唔會有影響咁話喎!