政Whats噏:律政司內部不和擺唔平 鄭若驊仲學人講調解?

2020年08月02日 15:42
東網電視
更多新聞短片
鄭若驊推廣調解服務,似乎欠說服力。
上任以來醜聞纏身、民望長期「墊司底」,被嘲為「避政司司長」嘅律政司司長鄭若驊今日(2日)又做「鍵盤戰士」,喺網誌話自己早前做咗個專訪,分享律政司點樣喺國際同本地進一步推動調解服務。但睇返近日發生嘅事件,即係刑事檢控專員梁卓然因為同鄭不和而「劈炮唔撈」,鄭連內部都調解唔到,佢依家仲講調解服務,簡直諷刺。
鄭若驊喺網誌引述佢喺專訪入面提到,律政司設有調解小組,專責落實推廣同發展香港嘅調解服務同長遠政策,例如舉行推廣活動、會議同培訓課程等等。調解小組都要持續發展香港調解服務嘅工作,促進使用香港調解服務以解決本地及國際糾紛,而目標係推動香港成為亞太區國際法律及爭議解決服務中心。
雖則講到調解服務有唔少好處,但鄭若驊上任至今2年半,已接連有律政司高層「跳船」,其中刑事檢控科更成為重災區。近日梁卓然已正式辭職,將喺今年12月31日離開服務咗25年嘅刑事檢控科,佢亦發出內部電郵通知同事,當中透露同鄭意見不合,而且情況一直冇改善,故提出請辭。早喺上年2月底,律政司前副刑事檢控專員許紹鼎同黎婉姬都雙雙離任。顯然律政司內部好多問題都調解唔到,鄭依家對外推廣調解服務,又邊有說服力呀!
理大專業及持續教育學院講師陳偉強直斥鄭仲喺訪問話要推廣調節簡直係對律政司嘅諷刺,陳話唔單止今次梁卓然劈炮唔撈事件,過去律政司內部都出現問題,但一直解決唔到,好似之前律政司1名檢控官竟然出書教人犯法等事,都睇得出鄭根本無力處理。
陳偉強話梁卓然封辭職信公開咗,反映鄭都係1個調解嘅失敗者,仲點樣可以向國際同內地推動調解呢?陳又指早前鄭出席記者會時已有記者提問梁卓然辭職事件,鄭只承認咗梁請辭,但無完滿解說。陳指鄭本應有責任出嚟解釋,但鄭唔敢作出澄清,會令大眾出現好多猜測,例如梁發出嘅內部電郵仲有乜嘢暗示,又會擔心鄭係咪同下屬唔夾,係咪以上壓下或者有冇打壓下屬等,導致公眾對律政司工作嘅信心減少囉!