政Whats噏:遭潘焯鴻稱「麒麟怪」 葉劉:好侮辱、好冇風度

2020年08月02日 17:47
東網電視
更多新聞短片
葉劉淑儀(右)批評,潘焯鴻(左)嘅言論具侮辱性,而且仲好唔尊重女性!
議員葉劉淑儀曾經喺2015年年初二喺車公廟被麒麟撞飛,之後每逢農曆新年都有網民重提呢件事。之不過,依家已經過咗新年咁耐,點解會有人話見到麒麟再現?話說早前曾報名參選立法會九龍西地方直選嘅潘焯鴻,尋日(1日)就喺Facebook(fb)上,話發現自己同葉劉幫襯埋同一間裁縫店,仲寸爆葉劉嘅造型好似「麒麟怪」!
葉劉淑儀今日(2日)亦喺自己fb上,上載多張日前到裁縫店嘅相片,見到葉劉當日戴住由政府派發嘅「銅芯口罩」,裁縫幫佢度身時仲除低咗外套,露出一雙玉手添!之不過,葉劉呢一身造型就惹嚟潘焯鴻攻擊,潘唔止嘲諷葉劉有「麒麟臂」,仲形容葉劉嘅打扮係「麒麟怪」添,認真火藥味濃。
面對被人身攻擊,葉劉覺得潘焯鴻嘅言論好侮辱,仲話人有肥有瘦,男士唔應該批評女士身材,直斥潘好冇風度添!葉劉仲特別提到,潘自己都有報名參選,反問佢有冇尊重過女性選民,又質疑潘係想抽水、借自己上位。被問到會唔會考慮採取法律行動時,葉劉就話,香港依家冇法例規管仇恨言論,所以就算呢啲言論有歧視性都告唔到。