政Whats噏:曾接受確診攝影師採訪 麥美娟話全程戴罩冇接觸

20200806
東網電視
更多新聞短片
麥美娟話雖然曾接受該名確診嘅電視台攝影師訪問,但冇接觸對方。
香港新冠肺炎確診數字仍然高企,確診患者遍布各行各業,就連政界同新聞界亦未能倖免,最近就有一名電視台攝影師證實受感染,有消息話佢喺本周日(2日)曾經採訪工聯會議員麥美娟(Alice)。Alice今日凌晨(6日)就喺社交網站發文,話自己當日的確有接受訪問,但就冇接觸過嗰名攝影師,仲話自己全程都有戴住口罩,又希望確診者能夠早日康復!
繼日前有建制派政黨嘅社區主任不幸染疫,尋晚(5日)再傳出有政界中人曾經接觸過確診人士,事件備受政圈及社會熱烈關注。被指曾經接受過確診攝影師採訪嘅Alice,喺貼文中話自己同嗰名攝影師並無接觸過,又提醒市民,話依家疫情嚴峻,無論係為自己定為他人着想,都要做好防疫措施,呼籲大家要記住戴口罩、勤洗手,有唔舒服就要及早睇醫生。
而佢自己都有做足保護措施,不但一直都有戴口罩,就連開會時都唔會除低,時常用酒精搓手液,入屋、上車前又會用消毒噴霧噴全身,因為自己係公眾人物、成日要接觸好多人,所以要做好呢啲嘢。而問到會唔會做病毒檢測以求心安,佢就話事實上由第三波疫情開始至今,自己已經做咗兩次,因為今次有好多源頭不明、無病徵嘅確診者,唔想自己成為散佈病毒嘅一份子,所以每隔一段時間都會check吓,等身邊人都安心咁話。