政Whats噏：紅磡街市有貓言論被鬧爆　任國棟致歉認意識不足

新冠肺炎疫情肆虐，近日更喺紅磡街市發現確診個案。九龍城區議員任國棟前日（4日）喺香港大學微生物學系講座教授袁國勇巡視紅磡市政街市時，同教授講街市入面有貓，引起了公眾關注街市內嘅貓隻安危，仲畀人鬧爆係想將貓趕盡殺絕添！任國棟尋晚（5日）喺社交平台發聲明道歉，承認自己係愛護動物方面嘅意識不足，已去信要求食環署尊重貓隻生命。

任話睇到網友嘅留言，明白到大家都好愛護動物，而佢自己都一樣，認同動物都有其生存權利，必須受到尊重同善待。佢又承認有關言論過分執着提醒袁國勇街市內曾出現貓隻，畀人誤解做要對貓隻趕盡殺絕，佢澄清絕無此意，都從未要求食環署捉貓。

跟住佢又話已經去信食環署，要求容許店主進入街市，將貓帶返屋企，或者畀義工進入街市將貓帶走暫托，街市重開後再貓歸原主，同時亦要求該署尊重貓隻的生命。