政Whats噏:顧委會促梁家榮多面對公眾 有重大事件要主動通報

20200810
東網電視
更多新聞短片
陳建強指港台的投訴機制有很大的改善空間。
香港電台(港台)節目屢次被批評立場偏頗,投訴節目嘅數字持續高企。香港電台顧問委員會工作小組今日(10日)召開第2次會議,顧委會主席陳建強建議,港台遇到重大事件同公眾關注嘅投訴需要主動向顧委會交代,促請廣播處長梁家榮要多啲面對公眾同傳媒,仲話港台嘅投訴機制有好大嘅改善空間。另有議員批評港台無視市民投訴,要求梁立即落台,又建議政府賦予顧委會更多權力,否則難以監察港台運作。
陳建強話,通訊事務管理局早前指港台節目《頭條新聞》污衊警方,對港台發出警告,而工作小組嘅目的就係令港台員工清晰明白《約章》精神,檢視港台一向處理投訴嘅機制同程序,同埋向梁家榮建議一套可行嘅機制以改善情況。
喺會議結束後,陳建議港台遇到重大事件同公眾關注嘅投訴,要主動向顧委會交代。陳以港台節目《頭條新聞》為例,話港台應該喺通訊局介入前知會顧委會,又建議梁要多啲面對公眾同傳媒,但否認會干涉港台嘅處理方法,強調只係知會性質。佢又話港台嘅投訴機制有好大嘅改善空間,梁責無旁貸,應該以不怠慢、不故步自封嘅態度處理投訴。至於香港電台嘅回應,話根據《約章》,顧委會就港台嘅服務向處長提供意見,港台一如既往配合,讓其聽取有關港台節目編輯方針、節目標準及質素嘅投訴報告。
議員葛珮帆話,港台接獲嘅投訴同讚賞應分開處理、唔可以相互抵銷,批評梁無視「排山倒海」嘅投訴,形容係「掩耳盜鈴」嘅舉動,直指梁冇資格繼續擔任廣播處長,應立即落台。葛認為,港台變成「無王管」嘅地步,係因為梁家榮失職,又話顧委會因權力所限未能發揮應有作用,形容喺港台嘅「擋箭牌」。佢建議政府賦予顧委會更多權力,或者由政府設立空開、透明嘅機制監察港台運作。
理工大學專業及持續教育學院講師陳偉強話,梁家榮以編採獨立性為藉口,無視電視節目《The Pulse》鼓吹「非一國論」,同埋《頭條新聞》污衊警方等投訴,形容港台已成為梁家榮嘅「獨立王國」,而梁張開「保護傘」任由職員喺「王國」內為所欲為。佢又話顧委會只係諮詢架構、並無實權,批評商務及經濟發展局處事唔夠果斷、多次縱容港台同梁家榮。佢認為局方應該立即對梁作出處分,等港台員工可以清楚明白政府嘅紅線同界限喇!