政Whats噏：出書涉教導疑犯避刑責　檢控官翁達揚上月離職

民望長期「墊司底」、被外界炮轟為「避政司司長」嘅律政司司長的鄭若驊，唔單止其身不正，更遭社會多番批評無能力管理下屬，被要求問責下台。其中律政司檢控官翁達揚喺上年出版嘅法律常識書籍，涉教導疑犯避開法律陷阱，更被外界質疑係「黑暴秘笈」，有消息指翁已向律政司刑事檢控科請辭，並於上月正式離任。有指翁今次「劈炮走人」可以避過律政司按照內部既定程序展開嘅內部調查。

翁達揚上年9月與另一名私人執業大律師合著出版《一讀就懂！孩子必須知的法律常識》，呢本書係專為青少年編寫嘅法律科啟蒙書，不過就被外界形容係「黑暴秘笈」，令社會嘩然。

翁達揚原本專責處理因為反修例示威而成立嘅「公眾秩序活動及電腦網絡罪行」特別組檢控工作，事件被揭發後，佢喺今年3月被調至「高等法院案件組別」，避免有利益同角色衝突之嫌，但係外界仍然覺得佢嘅著作一方面提醒青少年喺遊行示威被警方拘捕後嘅權利，另一方面又負責提供畀警方就被捕疑犯應唔應該提出檢控嘅法律意見，難免有利益衝突。