政Whats噏:區議員擬製黑白色議辦招牌 網民感不安

20200905
東網電視
更多新聞短片
網民話望到黑白色設計,聯想起白事感到不安。(互聯網)
一班區議員上任差唔多一年,但有民主派嘅議員辦事處一直未正式整招牌,最近就突發奇想自己設計,但有網民睇完竟然話覺得不安喎,到底係發生咩事呢?
元朗洪福區議員陳樹暉辦事處開業已經半年,但一直未整招牌,只係用過膠嘅A4紙頂住檔先。陳話一時無聊參考咗港式街招同登報廣告,試下自己設計招牌,仲將設計放上社交網站,見到上面簡介區議員提供嘅服務,包括處理街坊求助、辦理津貼福利等,仲寫明自己唔識通渠、電器、裝修,不過就話會盡量幫手,但就仲糾結緊用唔用個設計好。
但因為成個設計係黑白色,有網民直言望落感到不安,覺得似白事,話年老街坊可能會唔鍾意,仲熱心建議可以考慮用紅色、綠色等,令人感覺開心啲。陳就承認話自己都驚老人家望落唔開心,係其中一個糾結位咁話。
陳樹暉似乎想突破傳統設計,但就太出位,更引起大家不安,睇嚟佢都係交畀專業人士設計穩陣啲喇。