政Whats噏:大圍街市疫下復業問題多 議員捉食衞局講數

20200906
東網電視
更多新聞短片
大圍街巿雖完成冷氣系統工程,但議員現場視察,還是發現存在唔少問題。。
政府用咗逾1年時間為大圍街市裝修,期間需關閉街市8個月,以安裝冷氣系統工程,直到今日(6日)終於完工,而部分檔戶亦率先入場驗收。但礙於疫情導致人流減少,而檔戶亦要多畀一筆冷氣費,原本嘅檔戶會唔會踴躍搬返嚟唔在講,有議員落場視察,發現仲有好多問題未解決,例如天花漏水,同埋仲用舊式坑渠蓋,恐爆鼠患添!
議員容海恩(Eunice)同葛珮帆(EQ)分別喺社交平台上載影片,都係希望政府以不同嘅形式,協助因街市裝修而長期停業嘅商戶,幫商販渡過難關。此外,佢哋都話將會約見食物及衞生局反映街市問題,以及代商販同政府「講數」喎。唔知局長陳肇始點拆招呢?
Eunice話用咗8年時間先至爭取到街市安裝冷氣,往後檔販同市民都唔需要再「焗桑拿」,但有檔販擔心街市停業太耐,就算復業,人流都係會減少。雖然政府之前同街市商戶「傾掂數」,但Eunice話當時係未有疫情嘅情況,所以希望政府能夠按個別情況彈性處理,同埋聆聽市民嘅聲音。佢將會喺下個禮拜嘗試約見食衞局,希望可以延長免收冷氣費嘅期限,或者提高減租嘅幅度。
咁街市商戶又點睇呢?大圍街市互助委員會主席香松穩就話,大圍街市重啟後1年享有半租優惠、政府亦會豁免頭3個月嘅冷氣費。但有商戶擔心疫情下人流減少,希望政府提供更多支援。
EQ喺影片中就話,明白政府處理疫情都用咗唔少錢,但強調大圍街市嘅商戶都好耐冇營業,少不免要政府幫下手。有見及此,佢聽日就會聯絡食衞局,按商販嘅情況向政府提出,包括資助商販購置雪櫃等生財工具、延長減租期間等訴求。
雖然裝咗冷氣係好事,但EQ話街市內都仲有好多事項需要改善喎。佢今日親身到街市視察,話街市內有好多曱甴,加上坑渠蓋仲係沿用舊式嘅「長條形」,而非網狀設計,擔心會有食物殘渣跌落去,繼而引起鼠患問題。佢仲話部分商販入街市驗收舖位嘅時候,仲發現天花板有漏水嘅情況。
EQ話沙田區鼠患嚴重,街市嘅衞生問題有待改善,食衞局仲有唔少手尾要執之餘,相關部門都需要繼續跟進呀!