政Whats噏：民主派去留未決　林卓廷邀朱凱廸公開對談

政府因應新冠肺炎押後立法會選舉，現屆議員延任不少於一年，但民主派仍持續爭拗去留問題，其中民主黨等多名民主派議員決定依循民調決定。近日無論傾向留任或主張離任嘅議員，都有同外界解釋其意見。傾向留任嘅民主黨議員林卓廷今日(7日)仲去信畀主張離任嘅議員朱凱廸，認為朱只在網上發表意見，邀請朱作公開對談交換意見。

林卓廷喺信中形容朱凱廸係「撤出派」、「網上健筆」，係主張離任嘅代表人物，又指朱就去留問題喺facebook上發表幾篇文章，帶動社會熱烈討論，所以邀請朱作公開對談，等社會全面理解雙方論點，再讓公眾決定議會去留。

林卓廷解釋，決定將對香港影響非常深遠，即使棄選一年議會狀況亦唔會變好，只會造就建制派會收窄議事空間，反問係咪明年9月要再杯葛選舉。對於朱凱廸認為議會抗爭已不可為， 林卓廷認為過往民主派都會喺程序上抗爭，況且依家議事程序冇變，雖然唔可以直接否決，但可以以時間換取空間去拖延。