政Whats噏：游蕙禎被追討近百萬元　靠賣古董相機收藏品還債

因捲入宣誓風波而被法庭裁定喪失議員資格嘅游蕙禎，被立法會行政管理委員會入稟區院追債，要償還已發放嘅議員薪津共約93萬港元，同支付行管會嘅訟費，游最後願意分期攤還債項。游呢幾年就轉戰KOL界，係網上平台賣下嘢，但唔知賺唔賺到錢呢？

因為欠債纍纍，聽聞游蕙禎嘅還債壓力都唔細，收入來源靠買賣古董相機同收藏品，又因為有產品商搵佢合作所以投身KOL界，覺得幾好玩添。至於做KOL幫產品商賣嘢賺唔賺到錢，據講暫時都未有錢賺，又話分享產品主要係希望提升大家嘅生活品味，賺錢係次要喎。

游仲係議員嗰陣曾經試圖闖入立法會大樓會議室開會，被裁定非法集結罪名成立，被判入獄4星期。佢話當時係獄中諗咗好多嘢，明白到屋企人嘅重要，所以依家對於會唔會再從政都不置可否，都係希望照顧屋企人同埋還咗債先囉！