政Whats噏：被盜用身份登記檢測　周庭鄧家彪都有份

政府推行全民檢測計劃果然漏洞多多，由於網上預約系統只需輸入身份證及電話號碼即可進行預約，不設身份核對機制，至今已爆出140宗涉盜用他人身份資料預約的事件，最新再有2個中招，分別係立法會前議員鄧家彪（阿彪）同前香港眾志成員周庭，佢哋今日（10日）先後喺社交平台貼文，話畀人盜用個人資料，登記做全民檢測喎。不過佢哋唔同嘅係，一個畀人重複登記，一個就冇諗過去做啊。

話說今早周庭喺社交平台貼文，話尋日(9日)收到政府提示短訊，提醒佢聽日(11日)要去大角咀體育館接受檢測，佢仲上載有關短訊截圖做證明，但周庭話佢根本冇登記！

周庭又話收到短訊第一時間覺得好奇怪，估唔到自已被「被預約」，仲話唔講仲以為係建制派搞緊簽名活動，諷刺計劃有篤數之嫌，有13億人參加，佢都會信咁話。

唔知阿彪係咪想幫建制伸冤，佢今午都圖文並茂咁喺社交媒體出貼，話其實佢都有畀人冒認身份去登記檢測，又指自己明明9月1日做完檢測，9月2日出結果，結果9月3日竟然收到短訊，發現「有人」幫佢再預約。而阿彪亦已就事件報警要求追查。

照咁睇嚟，被盜用個人資料登記全民檢測真係無分政見喇。翻查資料，全民檢測計劃推出至今約有142.3萬人接受採樣，當中已有最少260宗個人資料被他人用作預約，當中最少144宗懷疑涉及盜用他人資料，依家警方跟進緊。