政Whats噏:一舊雲失言遭抗爭派狙擊 道歉再被鬧爆戀棧議席

2020年09月13日 15:33
東網電視
更多新聞短片
黃碧雲今次失言不單拖累民主黨,仲可能影響民主派延任。
12名港人喺內地被扣押事件惹起社會關注,民主黨議員涂謹申前日就喺自己Facebook(Fb)上就事件發文。點知黨友黃碧雲(一舊雲)竟然留言質疑,泛民總辭後就冇人幫到家屬,結果被「抗爭派」同網民圍剿,狠批佢只關心自己議席。事隔1日,一舊雲今日(13日)喺Fb發表道歉聲明,稱收回有關言論,而民主黨亦發聲明致歉。之不過,唔少網民繼續留言鬧爆,有個別網民更表明唔接受道歉,要求民主黨議員立即辭職。
事緣涂謹申、議會陣線議員朱凱廸同「抗爭派」鄒家成,日前陪同喺內地被扣押嘅12名港人嘅家屬召開記者會,希望港府提供協助,事後涂就喺Fb貼文重申家屬訴求。點知一舊雲竟然喺涂貼文下留言話:「朱(朱凱廸)議員如果撤退,就不能再用議員身份幫手足家屬。民主派議員若總辭,難道叫家屬去搵保皇黨議員?」隨即被網友狠批呢個時候就只關心自己個去留問題,更引來「抗爭派」鄒家成留言反問:「請問鄒家成有冇議席?」
涂謹申見勢色唔對,之後亦刪除相關貼文。可惜一切都太遲,戰場更伸延到Instagram。前香港眾志秘書長黃之鋒喺限時動態貼出一舊雲嘅留言截圖,並加上電影《蜘蛛俠》經典對白:「If you're nothing without the suit, then you shouldn't have it.」(如果你脫下戰衣就甚麼都不是,那你根本不配擁有它),暗寸對方係咪冇咗議席,就覺得自己乜都做唔到。
一舊雲今日終於知衰喺Fb發表道歉聲明,話明白將兩件事扣連或混為一談並唔恰當,可能會令被扣押港人及其家屬感到冒犯及不安,所以決定收回有關言論,並向家屬致深切問候,希望對方接受佢「摯誠的道歉」。
最後件事難收科,仲要出動到民主黨喺Fb貼文回應事件同道歉,話對於一舊雲喺社交媒體嘅不當言論,該黨主席胡志偉「謹此代表民主黨向被扣押人士及家屬致歉」。不過道咗歉唔係人人受落,兩個貼文嘅留言區依然惹來一片罵聲。唔少網民唔接受道歉,質疑佢戀棧議席,有網民直斥係垃圾,要求佢同民主黨議員辭職。
話時話,泛民喺下周一就會進行有關立法會去留嘅民意調查,一舊雲喺呢個敏感時刻失言,泛民隨時畀呢個「豬隊友」拖累,難怪胡志偉要急急衝出嚟補鑊喇!