政Whats噏:豪宅割價求售 葉劉:富豪走佬響警號

20200914
東網電視
更多新聞短片
葉劉淑儀認為香港出現信心危機,富裕階層撤資離港。
港島半山寶雲道係熱門嘅行山路線,議員葉劉淑儀尋日(13日)去行山時發現沿路布滿樓盤廣告,幾乎所有燈柱、欄杆同涼亭都貼滿大量放售物業嘅街招,葉劉指情況顯示有富裕階層打算撤資離港,可能係因為生意或投資失利,亦可能係對香港缺乏信心甚至徹底死心,認為市民對香港響起「信心危機」嘅警號。
葉劉指呢啲廣告有一個共通點,就係豪宅盤,全部位於傳統高尚地段,同時更表明放售單位係「割價」同「急售」。葉劉認為自從去年反修例示威造成社會動盪,加上今年疫情影響,唔少有錢人生意轉差,又對香港失去信心,看淡前景,所以咪離場囉。
葉劉話呢啲街招嘅樓盤儘管大減價,但年輕人仍然無法負擔,所以佢推測部分年輕人對香港失去信心先會發起示威。佢又話《港區國安法》實施後,暴力示威雖有所減少,但都只能夠解決犯法行為,解決唔到市民深層嘅不滿,市民亦唔相信香港經濟能夠復甦。
佢覺得香港社會絕對唔係「一次性派錢」或者短期惠民措施就可以解決問題。控制疫情固然係當務之急,但政府都要令香港市民同來自世界各地嘅人士,對香港重拾信心同希望,例如降低樓價,同埋増加青年人向上流動嘅機會。