政Whats噏:決不延任 陳志全將關閉將軍澳辦事處

20200915
東網電視
更多新聞短片
表明唔會接受延任嘅陳志全,將於本月23日結束其將軍澳地區辦事處。
今屆立法會任期原定本月30日結束,但因應港府早前宣布押後換屆選舉一年,全國人大常委會早前決定現任立法會議員可以喺呢段空窗期繼續履職。雖然民主派大部分議員仲未決定去留,但早前已表明唔接受延任安排嘅人民力量陳志全(慢必),今日(15日)就宣布將會關閉位於將軍澳嘅地區辦事處,更加決定將內裏嘅物資送畀街坊。
查實慢必早喺本月1日已經預告今個月底結束議辦,並且會終止聘用所有員工。佢今日就喺Facebook發貼文,強調延任安排並冇民意授權,重申自己喺4年任期結束後唔會留喺立法會,又形容其將軍澳辦事處將會喺本月23日「光榮結業」,並感謝街坊多年嚟嘅支持。
之不過,其辦事處過去一直有收集街坊唔要嘅物資,再透過舉辦「只送不賣」活動分發畀有需要人士,咁依家存放在內嘅物資點解決?慢必就喺辦事處外貼通告,寫住「結業在即、一件不留」,話與其將啲文具、書本、漫畫、傢俬等送去堆填區,不如呼籲有興趣嘅街坊到場領取咁話喎。