政Whats噏:何君堯鬧爆薛浩然不務正業 浪費金錢

2020年09月15日 19:59
東網電視
更多新聞短片
何君堯鬧爆薛浩然浪費鄕議局嘅錢。
新界鄉議局執行委員會會議今日(15日)召開,但點知作為執行委員之一嘅何君堯就因為一本書「辣着」,會後仲喺社交網站圖文並茂貼文,鬧爆該書作者,即係已故「新界王」劉皇發嘅妹夫、鄉議局研究中心主任薛浩然不務正業,話佢浪費鄕議局嘅錢,建議鄉議局係時候要節流,唔好要呢啲冗員喎!
何君堯以「鄉議局是時候要節流」為題,講到話今日開會,有一本名叫《香港馬照跑一東西文化融匯下的香港賽馬事業》嘅書放係枱面,而呢本書正係由薛浩然所著,話獻畀佢妻子。但書中大部分講述英國賽馬文化、起源、發展,至香港賽馬發展等,全部都從馬會資料庫、其他史籍或政府檔案中取得,仲話基本上無太大思維能力需求,全部都係炒作喎。
何認為呢啲嘢不值一文,又話替作者感到難為情,竟敢開口要求索價168蚊一本,鬧爆話呢本書同鄉議局無一啲關係,唔明白點解放係會議枱上。最後仲話支取過百萬元薪水嘅薛浩然不務正業,為馬會出書,浪費鄕議局嘅錢喎,建議鄉議局係時候要節流,唔好留冗員咁話!問返薛浩然點睇件事,佢就話真係要認真睇吓對方講咩,稍後再作詳細回應。