政Whats噏﹕環團聯署促請政府加強協調 推動垃圾徵費

2020年09月18日 19:01
東網電視
更多新聞短片
環團促請政府盡快推行強制性垃圾徵費計劃。
特首將於下個月公布施政報告,有環保團體聯署建議政府實施強制性垃圾徵費,而且建議各個政策局制訂政策嗰陣,應該加強協調咁話。
垃圾徵費計劃醞釀咗15年,原本有望喺今年年底落實,但因為泛民議員拉布而胎死腹中,意味草案需要推倒重來。適逢施政報告公眾諮詢嘅機會,15個環保團體今日(18日)聯署提交建議,希望政府盡快推行垃圾徵費計劃、塑膠容器生產者責任制、以及完善廢物回收系統。
政策本身固然重要,但推行政策嘅過程同樣重要。環保團體認為政府各個政策局制訂同實施政策嗰陣,應該加強協調同參與,以實現清晰而一致嘅長遠願景。環團仲建議應該規劃疫情下嘅經濟刺激方案,把握綠色復甦嘅機遇,例如增加使用可再生能源,為本地低碳經濟行業提供相關培訓,同時開拓就業機會。
除咗要加強政府內部溝通,環團認為政府需要同本地智庫、公民社會成員等緊密合作,保持雙向溝通以了解民情,令香港成為零碳排放嘅社會。睇嚟有關團體都認為政府推行政策嗰陣似乎太過閉門造車,應該要溝通多啲先啱喇。