政Whats噏：拍片回答房屋問題　黃偉綸被寸爆

政府今年嘅施政報告公眾諮詢大玩新模式，喺網上收集市民意見之後，各局長會拍片解答市民問題。而市民就多咗個平台批評各局長，尤其係不滿本港嘅房屋問題，而發展局局長黃偉綸就當然走唔甩喇。

政府成日話房屋問題係香港嘅深層次矛盾，但唔見得有積極解決問題，而市民就把握機會積極向黃偉綸表達意見喇。有網民建議盡快訂立空置稅，以及限制唔可以喺私人市場出售公共房屋。亦有市民提到香港有好多舊樓同舊式工業大廈，促請政府加快市區重建。香港輪候公屋問題嚴重，唔少市民被迫住劏房捱貴租，有人話希望政府實施租務管制，要用半份人工租樓實在慘不忍睹。

城市規劃議題同樣值得關注，有網民就寸爆問黃偉綸，市民嘅活動係咪30年不變，好似只係可以踩單車，覺得局方應該增設跑步徑、行山徑等唔同活動，令市民有更多選擇。