政Whats噏：部分康樂設施重開　范國威健身險「爆頭」

政府早前宣布逐漸放寬防疫措施，而康樂及文化事務署嘅部分康樂場所亦分階段重新開放。前議員、現任西貢區議員范國威(Gary)就落街玩雙槓，鍛煉途中唔知係「跣手」定「手軟」，差啲從雙槓上面跌落地。雖然佢及時用胳肋底夾住碌槓，但個頭都係撞咗落去。真係望落都覺痛呀！

Gary今日(20日)喺社交平台上載影片，條片前半部分見到冇着上衫嘅佢，好純熟咁係雙槓上面鍛煉，仲起勢咁「吊吊揈」、愈揈愈高。但可惜人生總係大起大落、飛得愈高跌得愈痛，片段嘅後半部分就見到佢突然手軟，從槓上面跌咗落嚟、仲撼到個頭。

唔少網民留言叫Gary小心啲；亦都有人話佢肌力未夠，唔應該做呢啲危險動作，同埋勸佢注意出手汗會容易跣。而Gary都話冇諗過街頭玩健身都有「爆缸」風險，奉勸市民鍛煉嘅時候要跟從專業教練嘅指導。而佢都經一事長一智，會再鍛煉吓基本功咁話喎！