政Whats噏：民主派立會去留民調今展開　網民大潑冷水　

之前有幾個民意調查結果都顯示，反對民主派議員延任嘅比率居多。由民主黨委託香港民意研究所進行立會去留嘅民調今日展開，可能因為畀抗爭派狂轟戀棧議席，民主黨同公民黨都喺社交平台「實牙實齒」話一定會服膺民調結果，但好多網民就大潑冷水。

民主黨同公民黨分別嘅社交平台專頁貼文宣布去留民調今日開始，呼籲市民記得聽電話同作出回應。兩個黨都話傾向留任，仲話無論走定留，希望主張留喺議會同主張杯葛議會嘅陣營要繼續合作添！

不過，部分網民就好似唔係咁諗喎，有人留言話泛民議員係咗錢、質疑民調係「黑箱作業」；另外都有網民叫佢哋留低嘅。無論點都好，兩個黨都話會服膺民調結果，咁就真係要拭目以待喇！

之前表示傾向於辭任嘅議員朱凱廸，就好似唔想理今次民調喎，仲諗好辭任後做乜嘢添。佢喺社交平台話，9月30日卸任後，希望可以做多啲氣候災難嘅公眾教育，似乎就關注緊氣候變化問題喇。

而非建制派議員鄭松泰早前就話會延任。就今次民調展開，佢對「總辭」持開放態度，倘若民調結果支持總辭作「政治表態」，並確定泛民主派嘅直選議員拒絕延任，屆時佢自有決定喎。