政Whats噏:陳帆自嘲髮型特別 官腔宣傳片反應冷淡

20200921
東網電視
更多新聞短片
陳帆接受訪問短片反應冷淡,發布4個鐘都係得幾個讚好。(影片截圖)
施政報告喺10月14日發表,政府喺社交平台開設專頁展開諮詢,收集網民嘅問題,再推出一系列同局長快問快答嘅短片。今日(21日)就發布咗運輸及房屋局局長陳帆嘅訪問片段,但陳帆對網民嘅問題答唔出重點,條片出咗街,反應好冷淡。
對於有網民話佢嘅髮型好特別,陳帆自嘲髮型都真係幾特別,因為戴咗口罩之後大家都仲認得佢喎。有網民覺得公屋輪候時間愈來愈長,驚單身人士上樓都要等成50年,陳就話經過政府多年覓地建屋,預期日後公屋供應會拾級而上,但係都係無答到點樣增加供應。
亦有網民指搭車好貴,想知政府有咩方法解救。陳只係話政府明白市民係公共交通費用嘅負擔,指已經提供咗補貼,即係叫市民自己諗辦法。
另外,有網民批評運輸署淨係識話係市區踩單車好危險,政策短視落後,陳竟然話市區係人多車多嘅地方,踩單車嘅話,去單車徑會理想啲。咁講法,如果無單車徑咪即係唔踩得單車?
快問快答,但陳帆答咗等於無答,仲講乜嘢同市民溝通呀!唔怪得條片出咗街,冇乜市民睇,與其嘥公帑做無謂宣傳,不如派錢益市民好過啦!